مــرحــبــــــــــا بــكـــم فــي أضخــــم موقــــع طبـــــي عــربـــــي
 
الرئيسيةالتسجيلدخول

شاطر | 
 

 يوميات طبيبة امتياز

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
dr saad
Admin


عدد المساهمات : 176
تاريخ التسجيل : 12/12/2010
العمر : 35
الموقع : http://medsurgery.ba7r.org

مُساهمةموضوع: يوميات طبيبة امتياز   الأحد 16 يناير 2011, 15:20

السلام عليكم ورحمة الله وبركاته

الموقف ده حصلى أيام ما كنت لسه امتياز

لما كنت ف لفة النسا حضرت عمليات
وفى يوم كده كانت حالات ولادة طبيعى

المهم زى ما انتو عارفين ان الدكتورة تفضل تقول للأم اللى بتولد

احزئى يا ماما

احزئى يا ماما

واللى بتولد يا عينى عمالة تصرخ

الدكتورة ترجع تقوللها

يا ماما احزئى ... انتِ كده بتصوتى ... انا عاوزاكى تحزئى

والست طبعا تصرخ

الدكتورة : يا ماما انتِ مش عارفة الإمساك .. اما يجيلك إمساك بتحزئى ولا تصوتى ... ياللا احزئى لتحت



هو ده كل الحوار اللى بيحصل ف الكشك بتاع الولادة الطبيعى غالبا يعنى


لأن الدور الوحيد للدكتور اللى بيولد طبيعى هو

prevention of complication

عشان كده من ضمن دوره برده انه يعمل

perineal support

عشان يتلافى حدوث ال

perineal tear

لأن ساعة خروج الطفل بيحصل

destention of vulva




المهم الحمد لله تلافينا حدوث المضاعفات

الست كانت بتحزأ شوية وتصوت شويتين

لغاية أما الدنيا اتيسرت وولدت



ربنا يكون ف عون كل اللى بيولدو

انا بعد ما شفت الولادة الطبيعى حسيت انها سهلة جدا

فراحت واحدة زميلتى ربنا أكرمها ببنوتة اسمها رغد قالتلى

انا كنت حاسة انى هموت وانا بولد


قلت ساعتها لنفسى أكيد انا غلطانة

اكيد بيعانو الأمرين ف الولادة



المهم الطفل اللى اتولد دلوقتى بقى ف إيد أمينة

ست الدكتورة راحت واخداه وفضلنا نعمله الحاجات اللى تخليه يتنفس

يعنى نحطه على أكسجين والذى منه الباقى لغاية اما ياخد أول نفس ليه

الطفل بتاعنا ده أول ما نزل عيط فمش كان فيه اى مشكلة



بس الدكتورة راحت عملت حاجة غريبة جدا

راحت تؤذن ف ودنه بصوت منخفض

ده مش عشان هو مايتخضش

لأ لأ علشان أمه ماتسمعش

التمريض كانت واقفة راحت قالتلها بصوت منخفض برده

"كده يادكتورة أسلمتيه ؟؟"



الدكتورة بتؤذن وتضحك


وساعتها عرفت إن أم الطفل ده مش زينا

وقتها افتكرت حاجتين

أول حاجة :

ان سبحان الله كل المواليد بيتولدو ع الفطرة يعنى بيبقى عندهم ميل طبيعى لاتباع الحق والهدى

مش النبى صلى الله عليه وسلم قال كده

" ما من مولود إلا يولد على الفطرة ،

فأبواه يهودانه ،

أو ........ ،

أو يمجسانه ،

كما تنتج البهيمة بهيمة جمعاء ، هل تحسون فيها من جدعاء .

الراوي: أبو هريرة المحدث: البخاري - المصدر: صحيح البخاري - الصفحة أو الرقم: 1359
خلاصة حكم المحدث: [صحيح]

تفتكرو الفطرة دى بتتغير؟؟

طبعا بتتغير بحاجات بيعملها الآباء

يعنى هما اللى بيوجهو أولادهم لاتباع أفكار معينة

والدليل على كده بقية الحديث اللى فات


بس طبعا كل واحد مطالب انه يدور ويبحث ويجتهد ويخلص ف بحثه عشان يرزق الصواب

أمال ليه النبى صلى الله عليه وسلم ماقالش "أو يسلمانه"

لأن دى هى الفطرة المذكورة ف أول الحديث


الموضوع ده فكرنى مرة واحنا كنا ف الحلقة والمعلمة بتدينا علو الهمة من آداب طالب العلم وكان بتحكى لينا عن قصة لواحد ربنا يسر له الهدى بس بعد معاناة ومشقة وبحث دؤوب

الحكاية دى لقيتها ف كتاب علو الهمة لفضيلة الشيخ المقدم صفحة 239

ياريت كلنا نقرئها

ف آخر الحلقة طلبت المعلمة مننا ان كل أخت فينا تقول حاجة هى خرجت بيها م القصة دى

انا كانت اكتر حاجة مأثرة فى ولغاية دلوقتى مش قادرة أنساها

هى نعمة الهداية للدين الحق والهدى


يااااااااااااااااااه .... دى أكبر نعمة فعلا لو نحسها

" الْحَمْدُ لِلَّهِ الَّذِي هَدَانَا لِهَذَا وَمَا كُنَّا لِنَهْتَدِيَ لَوْلا أَنْ هَدَانَا اللَّهُ"



تانى حاجة جت على بالى :

يمكن هى اول حاجة فكرت فيها بس حبيت اقول الكلام اللى ف الأول ده لأهميته بالنسبالى

تانى حاجة كان موضوع الآذان والإقامة فى أذن المولود

دى حاجة كده انتشرت بين الناس ولا أساس لها من الصحة على الإطلاق

حتى من كتر ما هى منتشرة كنت شفت فيديو كده

عن بيقولو انه دكتور وهو ماسك طفل مولود بين إيده وبيؤذن ف ودنه

ويقيم ف الودن التانية ويقولو ان المفروض كل الدكانرة تعمل كده بعد ما يولدو العيال

الله المستعان

هوطبعا اللى مرفوض تماما موضوع الإقامة ده

[حديث الإقامة في أذن المولود]
الراوي: - المحدث: ابن عثيمين - المصدر: مجموع فتاوى ابن عثيمين - الصفحة أو الرقم: 242/25
خلاصة حكم المحدث: ضعيف

وفيه رواية تانية " لا يثبت"


أما موضوع الآذان فى أذن المولود فأنا كنت سمعت إنه فيه برده كلام

وحبيت أجيبلكم الحديث ده

[حديث الأذان في أذن المولود]
الراوي: - المحدث: ابن عثيمين - المصدر: مجموع فتاوى ابن عثيمين - الصفحة أو الرقم: 242/25
خلاصة حكم المحدث: لا بأس به على أن فيه مقالاً

طبعا اللى يعرف عن موضوع الآذان ده ياريت يقول عشان كلنا نستفيد ويبقى جزاه الله الجنة

أصل حكاية الإتباع دى مهمة اوى عشان يبقى العمل صالح

أصل احنا مطالبين باتباع النبى ف امور الدين وطبعا الآذان والإقامة من الدين

والنبى صلى الله عليه وسلم يقول

" كل أمتي يدخلون الجنة إلا من أبى .

قالوا : يا رسول الله ، ومن يأبى ؟

قال : من أطاعني دخل الجنة ، ومن عصاني فقد أبى"

الراوي: أبو هريرة المحدث: البخاري - المصدر: صحيح البخاري - الصفحة أو الرقم: 7280
خلاصة حكم المحدث: [صحيح]




خلصت مع الدكتورة دى

رحت لكشك تانى بس لللأسف لقيت الدكتورة خلصت خلاص

ومعاها العيل

والأم عمالة تقول ....

الحمد ليك والشكر ليك يارب

الحمد ليك والشكر ليك يارب


حبيتها اوى وحسيت انه بتقولها بحب

اصل غالبا ف الوقت ده ... الكل بيبقى تعبان

يعنى مش بتبقى قادرة لأنها حاسة بألم واللى انتو عارفينه وكده ...


بس يا سلام لما بقى تبقى ف وسط المتاعب والألم ده وتنطق بيها

يارب الحمد لله ... الحمد لله

بيبقى طعمها جميل أوىىىىىىىى

"وَإِذْ تَأَذَّنَ رَبُّكُمْ لَئِنْ شَكَرْتُمْ لأَزِيدَنَّكُمْ وَلَئِنْ كَفَرْتُمْ إِنَّ عَذَابِي لَشَدِيدٌ "


بس كده

ف رعاية الله

والسلام عليكم
الرجوع الى أعلى الصفحة اذهب الى الأسفل
http://medsurgery.ba7r.org
 
يوميات طبيبة امتياز
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
بحـــر الطــــب والجـــراحــــة :: ا :: الطـــــلاب وأطبــاء الامتيـــــــاز-
انتقل الى: