مــرحــبــــــــــا بــكـــم فــي أضخــــم موقــــع طبـــــي عــربـــــي
 
الرئيسيةالتسجيلدخول
شاطر | 
 

 الزماله البريطانيه

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
dr saad
Admin


عدد المساهمات: 176
تاريخ التسجيل: 12/12/2010
العمر: 33
الموقع: http://medsurgery.ba7r.org

مُساهمةموضوع: الزماله البريطانيه    السبت 03 سبتمبر 2011, 12:54

الزماله البريطانيه تعتبر اكتر مشوار طبي بيدخله الاطباء المصريين بعد الماجستير المصري, بسبب تسهيلاتها الكثيره ومميزاتها عن غيرها واللي حنذكرها بالتفصيل في الموضوع ده




طب يعني ايه زماله اصلا؟ وهل فيه فرق بين ال Membership & fellowship?



زماله معناها عضويه في جمعيه اسمها الجمعيه الملكيه للاطباء البريطانيين, والعضويه دي بتديك امتيازات منها ...اشتراكات في مجلات علميه ومواقع انترنت في مقابل ضئيل جدا (حوالي 100 استرليني في السنه) لكن طبعا الميزه الكبيره في الموضوع هي قوة الشهاده نفسها كشهاده بريطانيه معترف بيها عالميا .
ومفيش فرق بين ال Membership وال fellowship , ببساطه شديده انت بتاخد عضويه الأول اللي هي ال Membership وبعد 6 الى 8 سنين من العضويه بتاخد الزماله او ال Fellowship , وتفرق ال fellowship عن ال membership انها منصب شرفي بتاخده بيديلك الحق انك تبقى ممتحن للناس اللي بتقدم على الزماله , يعني مجرد منصب شرفي بس طبعا أكيد بيزيد من قيمة الشهاده




طيب ايه مميزات الزماله البريطانيه عن غيرها؟



الزماله البريطانيه تتميز عن غيرها بما يأتي

1- لا تستلزم السفر خارج مصر للحصول على الشهاده

2- شهاده قويه جدا علميا وتعادل الدكتوراه المصريه

3- تكلفتها اقل بكثير من الامريكيه والاستراليه والكنديه

4- امتحاناتها اسهل بكثير من باقي المعادلات حيث تستلزم نجاح او سقوط فقط وليس سكور كالمعادله الامريكيه
5- ممكن تقدم بيها للعمل في دول كثيره من العالم زي استراليا واللي بتقبل الحاصلين على الزماله البريطانيه بالذات





طيب ايه الفرق بين الزماله البريطانيه وال PLAB
وهل الزماله بتديني فرصه اني اسافر بريطانيا؟



الفرق بين الزماله وال

Plab هو ان ال Plab
ده امتحان هدفه انك تاخد رخصه للشغل في بريطانيا, وبالتالي الزماله على قد ما هي شهاده قويه على قد ما ميزانها في بريطانيا نفسها ميسمحلكش انك تشتغل هناك كطبيب الا لو عندك الجنسيه البريطانيه





طيب مدتها قد ايه؟ وايه انواعها ؟

مدة المعادله البريطانيه في المتوسط من 3 الى 4 سنين, وأقل بكثير في زمالة الجراحه و النسا (حوالي سنتين)

وسبب التفاوت ده هو التالي:

ان من شروط التقدم لامتحان زمالة الباطنه هو مرور 12 شهر كطبيب في مستشفى تعليمي (يعني فترة الامتياز)

وتزيد في الأطفال لتصل الى 18 شهرا
لكن في الجراحه والنسا الشرط ده مش موجود فبالتالي معظم الناس بيقدموا على امتحان الجزء الاول جراحه او نسا في امتياز



زمالات المعادله البريطانيه كالتالي

MRCP زمالة الباطنه

RCPCH زمالة الاطفال

MRCS زمالة الجراحه

MRCOG زمالة النسا

RCOpth زمالة الرمد

RCPath زمالة التحاليل

RCOPsych زمالة النفسي
RCR زمالة الاشعه



مع ملحوظة ان آخر 4 زمالات
اماكن امتحانات الجزء الثاني موجوده في بريطانيا فقط لحد الآن





وحاليا بيناقشوا ادخال زمالتين جدد, لسه مبدأوش واحتمال يبدأوا من السنه الجايه ان شاء الله, لكن للاحاطه بالعلم, الجمعيه الملكيه بتاخد وقت طويل في مناقشة اي قرار جديد قبل تنفيذه, و الزمالتين الجداد هما

دبلومة Head & Neck Surgery
زمالة العظام





كام ممكن تكلف الزمالة البريطانيه من أولها لآخرها؟
تكلفة الزماله البريطانيه بتختلف من زماله للتانيه, وطبعا بتفرق اذا كان مكان امتحان الزماله موجود في مصر او لأ


لكن المتوسط هو 22 الف جنيه مصري



تتقسم كالتالي

الجزء الأول (أكاديمي) : 5500

الجزء الثاني( كلينيكال نظري) : 5500
الجزء الثالث (كلينيكال عملي) : 11000





ايه خطوات التقديم للزماله؟
اول شئ لازم تستوفي شرط الخبره لو طلبوها (زي الباطنه والاطفال) وبعد كده تروح للعناوين التاليه لكل زماله



زمالة الكلية الملكية البريطانية –أطفال-

لجنة التعليم الطبى المستمر

42 شارع القصر العينى -دار الحكمة

هاتف مباشر: 27958405\ 27963685
فاكس: 27962751\27958405





زمالة الكلية الملكية البريطانية –باطنة

لجنة التعليم الطبى المستمر

42 شارع القصر العينى -دار الحكمة

هاتف مباشر: 27958405\ 27963685
فاكس: 27962751\27958405







زمالة الكلية الملكية البريطانية –نساء وتوليد-

القاهرة – 40 شارع طاعت حرب- وسط البلد

مكتب : 25755869 فاكس : 5754271 2
أ.د/ عمر الشلقانى





زمالة كلية الجراحين الملكية – بانجلتر

192شارع النيل بالعجوزة

تليفون : 3031514 , 3001872

فاكس : 3443076

أ. هالة محمد " مسئولة الامتحانات بالمركز"
فرع التدريب بادارة الخدمات الطبية العسكرية بكوبرى القبة



زمالة الكلية الملكية البريطانية –الرمد

القاهرة –إدارة الخدمات الطبية- شارع الخليفة المامون – كوبرى القبة

هاتف-2603860 من 9 صباحاً إلى 2 ظهراً

The Royal College Of Ophthalmologists of England

17 Corn wall Terrace , LONDAN NW 1 40 QW
Tel : 01719350702 FAX: 01719359838




كل مركز مختص من العناوين اللي فوق بالزماله بتاعته بيحاول يوفرلك كل التسهيلات للزماله من كتب وكورسات و curriculum وبيتابعك لحد ما تنجح في كل الامتحانات باذن الله


وطبعا يوجد كورسات خارجيه وكتب للزماله متوفره بمكتبات القصر العيني





ايه نسبة النجاح في الامتحانات؟ وهل ممكن أعيد الامتحان اذا رسبت ولا لأ؟

نسبة النجاح في الامتحان تختلف بحسب الامتحان نفسه ومستوى المتقدمين فيه

يعني : لو كل المتقدمين للامتحان في مصر حصلوا على نسبه عاليه يبقى درجة النجاح حتبقى عاليه وبالتالي عدد الناجحين حيقل
والعكس صحيح


ويقال (من مصادر غير رسميه) ان النجاح في الامتحان من مصر صعب نسبيا مقارنة بنفس الامتحان ولكن من بريطانيا, لان المتقدمين للامتحان في بريطانيا درجاتهم اقل من المتقدمين للامتحان في مصر وبالتالي درجة النجاح أقل, عشان كده كثير من ناجحي الزماله البريطانيه بينصحوا انك تمتحن امتحانات الزماله في بريطانيا لو قدرت لأن الامتحان حيكون اسهل بالنسبالك في جو المنافسه الضعيف في بريطانيا مقارنة بمصر



في سنة 2007 كانت نسب النجاح كالتالي في زمالة الباطنه والأطفال (النسب منقوله من نقابة الاطباء)

الجزء الأول: 40% من عدد المتقدمين

الجزء الثاني: 60% من عدد المتقدمين
الجزء الثالث: 40% من عدد المتقدمين



وده مش معناه ان الامتحانات صعبه , ولا معناه برضه ان الامتحانات سهله, معناه ببساطه شديده ان الزماله البريطانيه زي غيرها محتاجه مذاكره بجديه, ولو ذاكرت بجديه حتنجح بسهوله ان شاء الله
واذا رسبت في اي امتحان بامكانك انك تعيده ولو عشرين مره بس طبعا بتدفع المبلغ بتاعه في كل مره بتعيد فيها الامتحان





ايه موضوع الخبره العمليه في امتحان الكلينيكال العملي؟ وكيف أحصل عليها؟

الخبره العمليه في امتحانات الكلينيكال دي مطلوبه أكتر في امتحانات الباطنه والأطفال اكثر من امتحانات الجراحه والنسا, والخبره دي بتسهل عليك مذاكرتك للامتحان وبتزيد من فرصة انك تنجح في الامتحان من أول مره
عشان تحصل على الخبره العمليه بامكانك انك تلتحق بالكورسات اللي بتوفرها النقابه, او الكورسات الخارجبه


لكن أحسن طريق واللي ينصح بيه معظم الناجحين في الزماله هو : النائب الزائر



وببساطه شديده النائب الزائر بيستلزم منك تقديم استقالتك من وزارة الصحه والالتحاق بأي مستشفى تختارها لمدة سنه او اتنين في مقابل مبلغ رمزي (حوالي 200 جنيه) بتدفعه ليهم
وطبعا الخبره العمليه الكافيه للنجاح من امتحان الكلينيكال العملي بتاخدها بسهوله جدا اذا كنت نايب زائر لمدة سنه الى سنتين




يعني ايه الزماله بتعادل الدكتوراه المصريه ؟


اي ممتحن بياخد أي زماله بريطانيه بيحصل على الآتي



1- يحصل على درجة أخصائي من النقابه

2- يحصل على درجة استشاري بعد 5 سنين من حصوله على الزماله

3- بيحصل على دكتوراه ناقصه مناقشة رساله فقط, يعني يستلزمه مناقشة الرساله فقط للحصول على الدكتوراه دون اي امتحانات
4- بيحصل على ال Fellowship بعد 6 الى 8 سنين على الأكثر





ايه عيوب الزماله البريطانيه؟

عيوب الزماله البريطانيه تتلخص في الآتي

1- طولها بالنسبه لباقي المعادلات (من 3 الى 4 سنين)

2- لا تسمح ليك بالسفر لبريطانيا للعمل
3- في أول الموضوع, الشهاده تعطيك مالا ولكن لا تعطيك علما, يعني مش بتديك خبره عمليه زي الامريكيه مثلا, ولكن الخبره دي بتكتسبها بعد كده بالممارسه




ايه اهم الكتب اللي ممكن اذاكر منها للزمالات المختلفه؟


يفضل انك ترجع لاماكن التسجيل الرئيسيه للزمالات لأنهم أكيد عندهم فكره بالمنهج ومصادره اكتر من أي حد وبصوره متجدده لكل سنه



في اللينك ده في قايمة باسم الكتب المطلوبه في امتحان

الباطنه والأطفال و النسا والجراحه

british fellowship
باقي التخصصات الكتب بتاعتها متواجده في مقر التسجيل بتاعها




يا تري بالنسبه للباطنه فيه تخصص بعد كده ولا باطنه عامه وبس؟


لأ فيه تخصصات جديده متاحه في الباطنه ممكن تتخصص فيها بعد ما تحصل على الزماله البريطانيه للباطنه MRCP


والتخصصات دي ليها امتحان اسمه KBA (knowledge Based Assisment)


والامتحانات دي حيبدأ تطبيقها باذن الله في التخصصات التاليه في سنة 2008



Acute Medicine

Clinical Pharmacology and Therapeutics

Dermatology

Endocrinology and Diabetes

Gastroenterology

Geriatric Medicine

Infectious Diseases

Medical Oncology

Neurology

Renal Medicine

Respiratory Medicine
Rheumatology


الامتحان عباره عن اختياري من متعدد (best of five)


تكلفته 1000 يورو


اماكن الامتحان هي هي نفس اماكن امتحان ’MRCP داخل بريطانيا وخارجها


ينفع أدخل امتحان KBA من غير ما آخد شهادة MRCP? , وهل فيه أي اخباره انهم حيلغوا امتحان MRCP ويستبدلوه بامتحانات السبشيالات؟؟





لا مينفعش, لازم تخلص الزماله البريطانيه للباطنه العامه الأول وبعد كده تدخل امتحان التخصص لو حبيت
(ممكن لو اخدت 3 سنين كنايب باطنه في بريطانيا انك تدخل امتحان التخصص على طول من غير ما تمتحن mrcp)


مفيش اي خطه معلن عنها في الوقت الحالي لالغاء امتحان MRCP لأنهم بيعتبروه كأنه تخصص باطنه عامه والامتحان ده مقدس جدا عندهم


ليه مفيِش امتحان KBA لل Cardiology?



مفيش امتحان كارديولوجي لأن الكارديولوجي حاليا ليه حاله خاصه

المفروض ان الهيئه اللي حتبقى مسؤوله عن امتحاناته اسمها الجمعيه البريطانيه للقلب ودي لغاية دلوقتي مقررتش اذا كانت حتعرف تعملها ولا لأ

لذلك آخر الأخبار هي انهم حيعملوا امتحان تجريبي في شهر يونيو 2009 في بريطانيا بس حيقيموا فيه نفسهم كممتحنين !!!!!
وبعد كده حيقرروا أول معاد للامتحان الرسمي لأول KBA في الكارديولوجي (لو التجربه نجحت طبعا وده أملنا ان شاء الله

_________________
دكتور
سعد السباعي
طبيب مقيم جراحة عامة
الرجوع الى أعلى الصفحة اذهب الى الأسفل
http://medsurgery.ba7r.org
 

الزماله البريطانيه

استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
بحـــر الطــــب والجـــراحــــة ::  :: -